Logo - Archief Eemland

Wouter Woutersoen als boelherder heeft belijt sculdich the wesen Mergryet Roloff van Kyps weduwe dree hollantsche gulden twintich hollantse stuver voir de gulden jairlix te renten wt alsulc goet hij heeft off vercrijgen mach int gericht van Amersfoirt te betalen nu op meydach (1 mei) toecomende die eerste renten ende soe voert an jairlix op deen dach ende altijt te mogen lossen heel off halff tot sijn schoensten de pennynck mit twyntich mit de onbetaelde verschenen renten nae beloip der tijt.

Mechtelt Henrick van Snellenberchs weduwe mit Pijll momber Pouwels van Snellenberch ende Neeltgen sijn huysfrou ende hebben belijt voir hoir ende hoiren erven wair dat saick dat Andryes Pouwelsoen ende Henrickgen sijn huysfrou ende hoiren erven tot enyger tijt enige hynder scade of gebreck cregen van ymant mitten recht an ende in de helft van derden halfve acker lants gelegen tot Emenes bynnendijks streckende van Goylant in de Eem thoe ende Andryes mit sijn huysfrou voirs. van Mechtelt Pouwels ende sijn huysfrou voirs. ontfangen hebben allet nae luden ende inholt der bryeff dairvan wesende off dat dair enige renten ofte commer in stonde die scade sullen Andryes ende sijn hyusfrou voirs. ende hoiren erven altijt mogen verhalen aen alsulcke goeden Mechtelt Pouwels ende sijn wijff voirs. hebben off vercrijgen mogen int gericht van Amersfoirt.

Alsoe dair sekere twist ende geschele verresen was tuschen Aryaen Theeussoen ter eener ende Herbert Cornelissoen ter andere beroerende van een coep van een huys ende dieselve alle hoir twyst verbleven an Henrick Pot ende Andries Pouwelsoen wes sij dairvan off wtsprekende werden sullen partijen voirs. mede gescheyden wesen, soe is onse eendrechtige wtspraick dat Herbert voirs. gheven ende betalen sel Aryaen voirs. vijff ende veertich karolusgulden alse twyntich hollantsche stuver voir den gulden de Herbert voirs. op dagen ende terminen nae besten betalen sall, te weten Jacobi (25 juli) toecomende dit lopende jair thyen gulden. Item Jacobi anno ses ende veertich noch thyen karolusgulden. Item noch op Sint Jacops dach anno soeven ende veertich # 10 gulden #. Item noch Jacobi anno acht ende veertich thyen karolus gulden ende an Jacobi anno negen ende veertich dat leste termijn tweten vijff gulden ende mit dese wtspraick sel al hoir scheel mede doet te nyt wesen. Blocklant, Henrick Meeussoen, Pot.

Herman van Vanefelt heeft belijt schuldich te wesen Jan Pijll tot behoeff Petertgen Henrick Petersoen dochter C (= 100) karolusgulden als twyntich hollantsche stuver voir de gulden dair off te paeschen nu toecomende te betalen 25 gulden ende paeschdach anno '46 25 gulden ende paeschen anno '47 25 gulden ende paeschdach anno '48 die leste vijff gulden twyntich ende dat op elcke termijn bij reael executie vermogen dordonantie des Hoefs Provinciael tot Utrecht.