Logo - Archief Eemland

Jan Reyersoen van Manen ende Kunera sijn wijff hebben gegeven Cornelis Pouwelsoen ende Anna sijn huysfrou den vrijen eygendom van de alinge husinge ende hofstede gelegen in den Roden Toernsche Poert dair aen die een sijde ende after Cornelis voirs. selven dat ander eynde een gemeen straet ende dander sijde den stadt mit een leege plaets naest gelegen sijn.

Kosijn Lambertsoen ende Gijsbert Rolofsoen als twe naeste vrienden ende magen van salige Kosijn Rolofsoen vijff onmundige kynder als Anna, Hilligont, Mery, Gerytgen ende Jan van vaders wegen Gijsbert Symonsoen ende Jacop Jansoen als twe naeste vryenden ende magen van hair moeders wegen ende als vier vierdelen ende Anthonia Kosijn Rolofsoen weduwe mit Pijll momber ende hebben gesamenderhant gegeven ende opgedragen Jan Rijcksoen alyas Roem ende Margryet sijn huysfrou den eygendom van de husinge ende hofstede gelegen op Blomedall dair Jan de Smit aen die een sijde ende Cornelis de Smit aen die ander sijde naest gelegen sijn # na vermogen der coepcedule #.

Jan Roem belijt Anthonia Kosijn Rolofsoen weduwe ses ende twyntich karolus gulden te betalen acht dagen nae den heyligen paeschdach toecomende op reael executie.

Rijck Dirck Rijcksoen ende Agnyes sijn wijff schelden tgoede Joist Thonissoen ende Hilligont sijn huysfrou een stuck erffs commervrij enige renten oft wtganck gelegen inden Langestraet after Joist voirs. husinge hij in woent, streckende achter soe veer als die steech wt is ende soe veer als Geryt Soes erffgoet lyntrecht ende besijden lintrecht van Joist Thonissoen hus off. Ende Joist mit sijn wijff sullen een doer after wt doen maken in die steech wt te gaen ende die steech te gebruicken tot hoeren schoensten. Ende Joist ende sijn wijff ende oeren erven sullen die steech mede onderhouden ende halff bevreden soe veer die gaet ende an die steech hoert, ende [oick] die poert an de straet ende soe mit die straet soe breet die steech is.